Description

Il-Ħajja u l-Avventuri ta Santa Klaws / The Life and Adventures of Santa Clausta’ Frank L. Baum u maqlub għall-Malti minn Matthew Scerri. L-ewwel edizzjoni ta’ dan il-ktieb ħarġet għall-bejgħ fl-1902. Sal-lum il-ġurnata għadu wieħed mill-iktar kotba popolari ta’ Baum, tant li fl-aħħar mija u għaxar snin kellna diversi edizzjonijiet tiegħu.

Ir-rakkont jibda mill-mument tal-addozzjoni tiegħu mill-Fatina Neċile fil-Foresta ta’ Burzee u jkompli pass pass tul ħajtu kollha: il-wasla f’Wied il-Għors; il-ħdim tal-ġugarelli għat-tfal; il-ksib tal-immortalità u ħafna episodji oħrajn. L-istil hu wieħed mexxej u b’sempliċità Baum jispjega lill-qarrejja l-bidu tat-tradizzjonijiet kollha marbuta mal-Milied, bħal pereżempju s-siġra tal-Milied. Għalkemm Baum dejjem emmen li l-vjolenza m’għandhiex ikollha post fil-kotba tat-tfal, f’Il-Ħajja u l-Avventuri ta Santa Klaws hemm aspetti daqsxejn mudlama u vjolenti fil-ġlieda bejn it-tajjeb u l-ħażin. Kollox ma’ kollox il-mertu kbir ta’ Baum hu dak li ddeskriva lil Santa Klaws b’mod mill-aktar ħaj, iwassalna biex insiru nafuh aktar mill-qrib u fl-istess ħin jgħaddilna tagħlima morali.

“Hekk dan ir-raġel, bit-tjubija kbira tiegħu, rebaħ il-qalb ta’ kulħadd; u mhix ħaġa tal-iskantament li kien dejjem kuntent u ferħan, għax ma kienx hemm dar fid-dinja kollha fejn ma kienx jiġi milqugħ aħjar mill-aqwa re.”